Milli Məclisin deputatı Azər Badamov İranın Naxçıvanı dron atəşinə tutmasını molla rejiminin riyakarlığı və nankorluğu kimi qiymətləndirib. Deputat bildirib ki, Azərbaycan İranla qonşuluq münasibətlərinə böyük önəm verir və baş vermiş hadisə ilə bağlı başsağlığı verərək səfirliyin önünə gül dəstələri qoyub. Eyni zamanda, Azərbaycan Livandakı iranlıların təxliyəsini təşkil edir və humanitar yardımlar göndərir.
Azər Badamov qeyd edib ki, bütün bunlara baxmayaraq, İran mülki obyektləri atəşə tutur. Deputat vurğulayıb ki, bu cür təxribatlarla Azərbaycanı qorxutmaq mümkün deyil və ölkəmizin öz ərazisini qorumaq üçün kifayət qədər gücü var.
Deputat əlavə edib ki, İran bu təxribatlarla əsl niyyətini ortaya qoyur və Azərbaycan İrandan izahat, üzr və təxribatda əli olanların cəzalandırılmasını tələb edir. O, Tehranda səfirliyimizə qarşı törədilən təxribatın da Azərbaycanı qorxutmaq məqsədi daşıdığını, lakin ölkəmizin prinsipial mövqeyinin İranı müvafiq addımlar atmağa məcbur etdiyini bildirib.
Azər Badamov Azərbaycanın İrandakı müharibənin tərəfi olmadığını, hətta öz ərazisindən istifadəyə icazə vermədiyini vurğulayıb. O, İranın hərəkətlərinin qəbuledilməz, beynəlxalq normalara zidd olduğunu və bütün məsuliyyətin İranın üzərinə düşdüyünü qeyd edib.